شعر عامي (دايمًا دايمًا على بالي)
بقلم/ حسام نشأت محمد
قاعد وحدي وفي حالي
فجأة لقيتك على بالي
ليه بس الله يهديكي
يا جميلة أنا كنت ناسيكي
ونسيت نظراتك ليّا
ومسكة إيدك لإيديا
ليه بس يا ضيّ عينيا
كان مالك بس ومالي
قاعد وحدي وفي حالي
لقيتك جيتي على بالي
رجعت ليَّ أيام صبايا
والنور شقشق جوايا
وبسمة اترسمت على وشّي
واتكيت على الحيط قفايا
غمضت عينيّا ثانية
حسّيت إنك معايا
مع إني كنت لوحدي
وإنتي معايا في خيالي
قاعد وحدي وفي حالي
فجأة لقيتك على بالي
أنا كنت حزين ومكشّر
على الماضي قاعد باتحسّر
أيام ضاعت من عمري
في بعادك إنت يا عمري
عظام جسمي بتتكسّر
أيام بعدك وليالي
قاعد وحدي وفي حالي
لقيتك جيتي على بالي
حاولت أشيلك منه
بس إنتي غصبًا عنه
شغّالة ليلة ونهاره
مش قادر يخمّد ناره
لا البعد مهوّن عنه
ولا القرب مغير حالي
حاولت أنساكي سنين
ليه بس بتيجي على بالي
قاعد وحدي وفي حالي
فجأة لقيتك على بالي
حبك عذّبني كثير
ويا سلام لو كنت سفير
لأغنّي غناوي في حبك
وأضرب طبل ومزامير
والعالم يهتف ليكي
وأرفع علمك في العالي
يا مصر يا أمّ الدنيا
دايمًا دايمًا على بالي
